អត្ថបទ៖ កែវ​ រតនៈ

សេចក្ដីប្រកាសព័ត៌មានរបស់ក្រសួងទេសចរណ៍ស្ដីពីលទ្ធផលនៃព្រឹត្តិការណ៍បុណ្យទន្លេ លើកទី៩ នៅខេត្តតាកែវ ក្រោមប្រធានបទ «គុណតម្លៃនៃទន្លេ៖ ផ្សារភ្ជាប់វប្បធម៌ និងទេសចរណ៍ធម្មជាតិ» ដែលធ្វើឡើងកាលពីថ្ងៃទី​២១ ដល់ថ្ងៃទី២៣ ខែមីនា ឆ្នាំ២០២៥កន្លងទៅនេះបានឱ្យដឹងថា ព្រឹត្តិការណ៍បុណ្យទន្លេ លើកទី៩នេះបានប្រ​ព្រឹត្ត​ទៅប្រកបដោយ បរិយាកាសអធិកអធម និងសប្បាយរីករាយ ដោយទទួលបានការចូលរួមយ៉ាងច្រើនកុះករ​ពីភ្ញៀវទេសចរជាតិ-អន្តរជាតិ ដែលអញ្ជើញមកពីគ្រប់មជ្ឈដ្ឋាន។

សេចក្តីប្រកាសព័ត៌មានបន្តថា ព្រឹត្តិការណ៍ដែលមានការអញ្ជើញជាអធិបតីពីសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជា

ណាចក្រកម្ពុជា នៅក្នុងពិធីបើកជាផ្លូវការព្រឹត្តិការណ៍នេះ ប្រព្រឹត្តទៅប្រកបដោយភាពឱឡារិក អធិកអធម មានភាពរលូន សុខសុវត្ថិភាព មានសណ្តាប់ធ្នាប់សាធារណៈល្អ រក្សាបាននូវបរិស្ថានអនាម័យល្អ ទទួលបានការគាំទ្រពីគ្រប់មជ្ឈដ្ឋានជាតិ-អន្តរជាតិ ព្រមទាំងទទួលបានភាពជោគជ័យប្រកបដោយលទ្ធផលវិជ្ជមានដោយក្នុងរយៈពេល ៣ថ្ងៃនេះរួមមានទេសចរជាតិមកលេងកម្សាន្តសរុបជិត៣៦ម៉ឺននាក់ និងទេសចរបរទេសប្រមាណជាង១ពាន់នាក់។

ចំពោះការតាំងពិព័រណ៍សមិទ្ធផល មហោស្រពម្ហូបអាហារនិងភេសជ្ជៈ ការតាំងពិព័រណ៍ពាណិជ្ជកម្មផលិតផល ក្នុងស្រុក និងផលិតផលកសិ-ទេសចរណ៍ គម្រោងអភិវឌ្ឍន៍ទេសចរណ៍នៅខេត្តជាប់ដងទន្លេ ព្រមទាំងការ សម្តែងទស្សនីយភាពសិល្បៈ ការប្រគំតន្ត្រី តន្ត្រីមហាជន និងព្រឹត្តិការណ៍កម្សាន្តសប្បាយជាច្រើនទៀត ទទួលបានការចូលរួមទស្សនាជាច្រើនកុះករ និងមានការគាំទ្រយ៉ាងផុសផុលពីភ្ញៀវទេសចរជាតិ-អន្តរជាតិ។

ចំណែកសកម្មភាពកីឡារួមមានទាំងកីឡាលើទឹកនិងលើគោកចំនួន១០ប្រភេទ រួមមាន៖ រត់កម្សាន្តមហាជន ៥KM កីឡាវាយសី កីឡាប៉េតង់ កីឡាអុកចត្រង្គ ជិះទូកកាយ៉ាក ទូកកានូ កីឡារែក លោតមឹក កីឡា ប្រដាល់​គុនខ្មែរ កីឡាប៉ារ៉ាមូទ័រ និងការបង្ហោះគោម ។

បើតាមក្រសួងទេសចរណ៍ ព្រឹត្តិការណ៍បុណ្យទន្លេ បានផ្តល់នូវអត្ថប្រយោជន៍យ៉ាងច្រើន ដូចជា៖ ទី១៖ បង្ហាញពីសាមគ្គីភាពរឹងមាំគ្រប់តួអង្គពាក់ព័ន្ធ តាមអភិក្រម «ជវភាព នៃប្រព័ន្ធតួអង្គតែមួយ» ទី២៖ ជំរុញការអភិវឌ្ឍ និងកំណើនសេដ្ឋកិច្ច ទី៣៖ លើកកម្ពស់ការអភិវឌ្ឍបៃតង ដែលមានការគិតគូរអំពីធនធានវប្បធម៌ ធម្មជាតិ និងបរិស្ថាន ទី៤៖ លើកកម្ពស់ការអប់រំ និងការយល់ដឹង និង ទី៥៖ លើកកម្ពស់វិស័យទេសចរណ៍កម្ពុជា។

ក្នុងឱកាសពិធីបិទព្រឹត្តិការណ៍បុណ្យទន្លេ លើកទី៩ លោកអភិបាលនៃគណៈអភិបាលខេត្តតាកែវ ក្នុងនាមជាខេត្តម្ចាស់ផ្ទះ បានប្រគល់ទង់បុណ្យទន្លេជូន អភិបាលខេត្តពោធិ៍សាត់ ដែលជាខេត្តទទួលសិទ្ធិក្នុងការរៀបចំព្រឹត្តិការណ៍បុណ្យទន្លេ លើកទី១០ នៅក្នុងអំឡុងខែមីនា ឆ្នាំ២០២៦៕