ដោយ ៖ កែវ រតនៈ

 មន្ទីរទេសចរណ៍ខេត្តស្ទឹងត្រែងបានសហការជាមួយអាជ្ញាធរ និងភាគីពាក់ព័ន្ធនឹងរៀបចំជាព្រឹត្តិការណ៍ទេសចរណ៍ មួយដ៏អស្ចារ្យគឺ«ស្ទឹងត្រែងលើសពីទន្លេ លើសពីធម្មតា (Stung Treng- Beyond the Rivers, Beyond the Ordinary) »នៅថ្ងៃទី០៧ ខែមីនា ឆ្នាំ២០២៦ខាងមុខនេះ។ ក្នុងព្រឹត្តិការណ៍នោះ គឺជាព្រឹត្តិការណ៍ដែលប្រជាពលរដ្ឋក៏ដូចជាភ្ញៀវទេសចរអាចចូលរួមជាលក្ខណៈមហាជន ដោយសេរី ដោយពាក់ឯកសណ្ឋានអាវកីឡា។

 មន្ទីរទេសចរណ៍ខេត្តស្ទឹងត្រែងឱ្យដឹងថា ប្រសិនមហាជនមានចំណាប់អារម្មណ៍អាចអញ្ជើញចុះឈ្មោះចូលរួម តាមរយៈតំណLinkរបស់មន្ទីរទេសចរណ៍ខេត្ត ដើម្បីទទួលបានអាវយឺតដ៏ស្រស់ស្អាតមួយផងដែរ ដែលក្នុងនោះអាវគឺផ្ដល់ជូនចំនួន៣០០នាក់ ។ ហើយបន្ទាប់ពីនោះប្រសិនបើអ្នកមានបំណងចង់បានអាវយឺតដ៏ស្រស់ស្អាតបន្ថែម ក៏អាចចុះឈ្មោះជាវអាវបន្តែមជាមួយក្រុមការងារជាមុន ដោយជូនដំណឹងពោលគឺថ្ងៃផុតកំណត់ឈប់ទទួលនៅត្រឹមថ្ងៃទី១៧ ខែមីនា ឆ្នាំ២០២៦ នៅវេលាម៉ោង ៥៖០០ នាទីល្ងាច ដើម្បីឲ្យក្រុមការងារបានរៀបចំបោះពុម្ភអាវយឺតជូនឲ្យបានទាន់ពេលវេលាតាមព្រឹត្តិការណ៍ដែលគ្រោងខាងលើនេះ។

​ព្រឹត្តិការណ៍«ស្ទឹងត្រែងលើសពីទន្លេ លើសពីធម្មតា» មានជាព្យុះហយាត្រាកម្សាន្តទេសចរណ៍ ចម្ងាយ ៣.៥ គីឡូម៉ែត្រ នៅក្នុងក្រុង រួច ក៏នឹងបន្តភ្ជាប់ចេញដំណើររបស់ថ្នាក់ដឹកនាំក្រសួងទេសចរណ៍ និងថ្នាក់ដឹកនាំខេត្តទៅទស្សនាកម្សាន្តតំបន់ទេសភាពព្រៃលិចទឹករ៉ាំសារ ទន្លេមេគង្គលើ សហគមន៍អេកូទេសចរណ៍បុរីអូរស្វាយ និងមានការបោះតង់ស្នាក់នៅលើ កោះទន្សាយ នៅទល់មុខស្រុកបុរីអូរស្វាយសែនជ័យ ដែលការរៀបចំសេវាកម្មខាងលើនេះ ដោយសហគមន៍អេកូទេសចរណ៍បុរីអូរស្វាយផ្ទាល់ និងមានការចូលរួមជួយសម្របសម្រួលដោយមន្ត្រីមន្ទីរទេសចរណ៍ខេត្ត៕

រូបភាព៖ មន្ទីរទេសចរណ៍ខេត្តស្ទឹងត្រែង