អត្ថបទ៖ កែវ រតនៈ ១០

កាលពីថ្ងៃទី១៩ ខែមីនា ឆ្នាំ២០២៤ ឯកឧត្តម សុខ សូកេន រដ្ឋមន្រ្តីក្រសួងទេសចរណ៍បានទទួលជួបពិភាក្សាការងារជាមួយតំណាងសមាគមទេសចរណ៍កម្ពុជាហៅកាត់ថា កាតា  ដឹកនាំដោយលោកជំទាវ ឆាយ​ ស៊ីវលីន ប្រធានសមាគម ដើម្បីរាយការណ៍ពីលទ្ធផលការងារសម្រេចបានកន្លងមក និងស្នើសុំការគាំទ្រពីក្រសួងទេសចរណ៍លើសកម្មភាពការងារអនុវត្តបន្តឆ្នាំ២០២៤ និងឆ្នាំបន្តបន្ទាប់របស់សមាគមទេសចរណ៍កម្ពុជា។

លោកជំទាវ ឆាយ ស៊ីវលីន មានប្រសាសន៍ថា មកដល់ពេលនេះសមាគមទេសចរណ៍កម្ពុជា​បានចុះហត្ថលេខាជាមួយក្រុមហ៊ុនទេសចរណ៍ជាដៃគូតាមប្រទេសជាច្រើន ដើម្បីបង្កើនកិច្ចសហប្រតិបត្តិការនាំភ្ញៀវទេសចរអន្តរជាតិពីប្រទេសនានាមកទស្សនាកម្ពុជា ដោយក្នុងនោះសមាគមទេសចរណ៍កម្ពុជាបានរៀបចំកញ្ចប់ទេសចរណ៍ពិសេសៗជូនភ្ញៀវ និងអ្នកសារព័ត៌បរទេសជាច្រើនដើម្បីឱ្យជួយផ្សព្វផ្សាយពីសក្ដានុពលវិស័យទេសចរណ៍នៅកម្ពុជា។ បើតាមលោកជំទាវ ឆាយ ស៊ីវលីន កន្លងមកសមាគមទេសចរណ៍កម្ពុជាបានរៀបចំកញ្ចប់ទេសចរណ៍ពិសេសជូនភ្ញៀវទេសចរ និងអ្នកសារព័ត៌មានអន្តរជាតិ មកពីប្រទេសថៃ ឥណ្ឌា ចិន ហ្វីលីពីន បារាំង ឌូប៉ៃ       ហើយក៏ត្រៀមទទួលភ្ញៀវទេសចរណ៍អន្តរជាតិដែលបើករថយន្តទំនើបៗដោយខ្លួនឯកមកពីតាមបណ្ដាប្រទេសនានាចូលកម្ពុជាផងដែរ។

លោកជំទាវ ឆាយ ស៊ីវលីន លើកឡើងថា ​ដើម្បីទាក់ទាញភ្ញៀវទេសចរបរទេសមកទស្សនាកម្ពុជាឱ្យបានកាន់តែច្រើន សមាគមទេសចរណ៍កម្ពុជា ស្នើសុំឱ្យភាគីពាក់ព័ន្ធទាំងអស់ជួយសម្រួលការងាររបស់សមាគមក្នុងរៀបចំកញ្ចប់ទេសចរណ៍ជូនភ្ញៀវបរទេសដើម្បីធ្វើយ៉ាងណា ឱ្យភ្ញៀវដែលបានមកទស្សនាកម្ពុជាហើយ ចង់មកម្ដងទៀត ព្រមទាំងជួយផ្សព្វផ្សាយពីសក្ដានុពលដែលកម្ពុជាមាន។

ឯកឧត្តម សុខ សូកេន រដ្ឋមន្រ្តីក្រសួងទេសចរណ៍បានវាយតម្លៃខ្ពស់ពីសមិទ្ធផលសម្រេចបានកន្លងមក និងថ្លែងអំណរគុណដល់សមាគមទេសចរណ៍កម្ពុជាដែលបានចូលរួមយ៉ាងសកម្មជាមួយក្រសួងទេសចរណ៍ក្នុងការស្តារ និងលើកស្ទួយវិស័យទេសចរណ៍កម្ពុជា។ ឯកឧត្តមរដ្ឋមន្រ្តី បានលើកទឹកចិត្តឱ្យសមាគមបន្ត សកម្មភាពការងាររបស់ខ្លួន និងស្នើសុំការចូលរួមពីសមាគមទេសចរណ៍កម្ពុជាឱ្យបានសកម្មក្នុងក្រុមប្រឹក្សាភិបាលសិក្សាទីផ្សារ និងផ្សព្វផ្សាយទេសចរណ៍កម្ពុជា។

គូរបញ្ជាក់ថា ពេញមួយឆ្នាំ២០២៣ កម្ពុជាទទួលបានភ្ញៀវទេសចរបរទេសចំនួន ៥,៤៥៣,២៣១នាក់ កើនឡើង ១៣៩.៥ភាគរយ បើធៀបនឹងឆ្នាំ២០២២​ នេះបើតាមរបាយការណ៍របស់ក្រសួងទេសចរណ៍។ បើតាមក្រសួងទេសចរណ៍ ចំនួនភ្ញៀវទេសចរបរទេសជាង៥លាន៤សែននាក់នោះ គឺចូលមកតាមជើងហោះហើរចំនួន ១,៨៦៦,២៣១នាក់ មកតាមផ្លូវគោកចំនួន ៣,៥២០,៧៣០នាក់ និងមកតាមផ្លូវទឹកចំនួន ៦៦,២៧០នាក់។

របាយការណ៍ឱ្យដឹងទៀតថា ក្នុងចំណោមភ្ញៀវទេសចរបរទេសដែលចូលមកទស្សនាកម្ពុជា ៥,៤៥៣,២៣១នាក់នេះដែរ គឺបានចាកចេញពីកម្ពុជាវិញចំនួន ៥,២៥៤,៦១៩នាក់។ ក្នុងឆ្នាំ២០២៣ដូចគ្នានេះ ប្រជាពលរដ្ឋកម្ពុជាក៏បានចេញទៅក្រៅប្រទេសចំនួន ១,៨១៩,៥០៤នាក់ផងដែរ ក្នុងអត្រាកំណើន ១៥២.៣ភាគរយ៕