អត្ថបទ៖ កែវ រតនៈ

យោងតាមការផ្សព្វផ្សាយរបស់បេឡាជាតិសន្តិសុខសង្គម ឬហៅកាត់ថា ប.ស.ស. បានឱ្យដឹងថា ឯកឧត្តម គឹម កែវរស្មី អគ្គនាយករង ប.ស.ស. តំណាង ឯកឧត្តម ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. នៃក្រសួងការងារ និងបណ្ដុះបណ្ដាលវិជ្ជាជីវៈនៅថ្ងៃទី១៥ ខែកញ្ញា ឆ្នាំ២០២៥នេះ បានដឹកនាំនាយកដ្ឋានជំនាញ ចូលរួមកិច្ចប្រជុំពិភាក្សាជាមួយអាជ្ញាធរសវនកម្មជាតិ ស្ដីពី "ការធ្វើសវនកម្មលើរបាយកាណ៍ហិរញ្ញវត្ថុរបស់បេឡាជាតិសន្តិសុខសង្គមសម្រាប់ការិយបរិច្ឆេទឬ ហៅថា​​កម្រិត​នៃ​កិច្ច​ការ​ដែល​ត្រូវ​ធ្វើ ២០២៤ និងឆ្នាំពាក់ព័ន្ធ"។ កិច្ចប្រជុំនេះបានធ្វើឡើងនៅសាលប្រជុំនាយកដ្ឋានគ្រប់គ្រងថវិកា ហិរញ្ញវត្ថុ និងគណនេយ្យ នៃ ប.ស.ស. ដោយមានការចូលរួមពីថ្នាក់ដឹកនាំ និងមន្ត្រីជំនាញនៃនាយកដ្ឋានរដ្ឋបាលនិងគ្រប់គ្រងធនធានមនុស្ស, នាយកដ្ឋានគ្រប់គ្រងថវិកា ហិរញ្ញវត្ថុ និងគណនេយ្យ និងអង្គភាពសវនកម្មផ្ទៃក្នុងនៃ ប.ស.ស. សរុបប្រមាណជាង ២៥នាក់។

ក្នុងឱកាសនោះ ឯកឧត្តមអគ្គនាយករង ប.ស.ស. បានស្វាគមន៍យ៉ាងកក់ក្ដៅចំពោះគណៈប្រតិភូសវនកម្ម នៃអាជ្ញាធរសវនកម្មជាតិ ដែលបានអញ្ជើញមក ប.ស.ស. ដើម្បីធ្វើសវនកម្មលើរបាយកាណ៍ហិរញ្ញវត្ថុរបស់បេឡា​​​ជាតិសន្តិសុខសង្គមសម្រាប់ការិយបរិច្ឆេទ ២០២៤ និងឆ្នាំពាក់ព័ន្ធ។

បន្ថែមពីលើនេះទៅទៀត ឯកឧត្តមអគ្គនាយករង ប.ស.ស. ក៏បានស្នើសុំនាយកដ្ឋានជំនាញទាំងពីរ និងអង្គភាព​សវនកម្មផ្ទៃក្នុង នៃប.ស.ស. ចូលរួមសហការ ជាមួយគណៈប្រតិភូសវនកម្ម នៃអាជ្ញាធរសវនកម្មជាតិ ក្នុងការផ្តល់ទីកន្លែង ឯកសារ ព័ត៌មានពាក់ព័ន្ធផ្សេងៗ ឱ្យបានទាន់ពេលវេលា ដើម្បីឱ្យការធ្វើសវនកម្មនេះ ដំណើរទៅយ៉ាងរលូន និងសម្រេចបានជោគជ័យ។

សូមបញ្ជាក់ថា អាជ្ញាធរសវនកម្មជាតិ មានកាតព្វកិច្ចធ្វើសវនកម្មលើគ្រប់ក្រសួង-ស្ថាប័ន រាជធានី-ខេត្ត និងរដ្ឋបាលមូលដ្ឋាន គ្រឹះស្ថានសាធារណៈ និងសហគ្រាសសាធារណៈ ៕

 រូបភាព៖ ប.ស.ស.