ដោយ៖ កែវ រតនៈ

ព្រឹត្តិការណ៍ CAFE25 ដែលក្នុងនោះក៏មានពិព័រណ៍កសិកម្ម ប្រព្រឹត្តទៅរយៈពេលបួនថ្ងៃ ចាប់ពីថ្ងៃទី១៣ ដល់ថ្ងៃទី១៦ ខែវិច្ឆិកា ឆ្នាំ២០២៥ នៅអគារ E&F នៃមជ្ឈមណ្ឌលសន្និបាត​និងពិព័រណ៍កោះពេជ្រ រាជធានីភ្នំពេញ។

ក្រៅពីផ្តល់ឱកាសដល់អ្នកចូលរួមក្នុងការទំនាក់ទំនងដោយផ្ទាល់ជាមួយថ្នាក់ដឹកនាំ និងមន្ត្រីរាជរដ្ឋាភិបាល វិនិយោគិនក្នុងស្រុក និងក្រៅស្រុក និងអ្នកជំនាញអាជីវកម្មកសិកម្មនានា ព្រឹត្តិការណ៍ CAFE25 ក៏មានកម្មវិធីទស្សនកិច្ចរបស់កសិករជាង ៨,០០០នាក់នៅទូទាំងប្រទេស ដើម្បីចូលរួមទស្សនាពិព័រណ៍ដោយផ្ទាល់ផងដែរ។

លោក ខ្វាន់ ឆៃវ៉ាត់ កសិករមកពីខេត្តត្បូងឃ្មុំ បានប្រាប់បៃតងប៉ុស្តិ៍ថា ពេលដែលលោកបានមកដល់ និងបានទស្សនាស្ដង់ពិព័រណ៍កសិកម្មនេះលោកពិតជាសប្បាយរីករាយ ហើយនឹកស្មានមិនដល់ថាកម្ពុជាអាចមានការរៀបចំបែបនេះហើយអ្វីដែលោកចាប់អារម្មណ៍ខ្លាំងជាងគេគឺផលិតផលកសិម្មប្រភេទផ្លែឈើជាច្រើនមុខ គ្រឿងចក្របម្រើដល់វិស័យកសិកម្ម ព្រមទាំងជីធម្មជាតិដែលប្រើប្រាស់លើដំណាំផ្សេងៗ។

អ្នកស្រី ខៀវ រិទ្ធីដា ជាកសិករមកពីខេត្តកំពង់ស្ពឺក៏បានលើកឡើងដែរថា​នេះជាលើកទី១មួយហើយដែលអ្នកស្រីបានឃើញផលិតផលកសិកម្មជាច្រើនមុខដែលផលិតដោយកូនខ្មែរបានដាក់បង្ហាញរួមគ្នាយ៉ាងដូច្នេះ។ អ្នកស្រីបន្តថា​នៅតំបន់ដែលអ្នកស្រីរស់នៅភាគច្រើនគឺដាំដុះដំណាំស្រូវ ហើយនៅពេលដែលមកចូលរួមក្នុងពិព័រណ៍នេះបានឃើញការតាំងបង្ហាញប្រភេទជីជំនួយដំណាំស្រូវជាច្រើនប្រភេទ ដែលជាចម្រើសសម្រាប់កសិករយកទៅប្រើប្រាស់ជំនួយដំណាំស្រូវរបស់ពួកគាត់។ អ្នកស្រីបន្ថែមថា ពេលត្រឡប់ទៅវិញ​អ្នកស្រីនឹងពាំនាំនូវអ្វីដែលអ្នកស្រីបានឃើញ និងយល់ដឹងពីប្រភេទជី និងវិធីប្រើប្រាស់ជីចែករំលែកដល់អ្នកភូមិ ស្រុកដែលជាកសិករដូចគ្នាបានដឹងនិងយល់ពីរបៀបប្រើប្រាស់។

លោក គឹម រីន  កសិករមកពីស្រុកកៀនស្វាយ ខេត្តកណ្ដាល បានរៀបរាប់ថាតាមរយៈការទស្សនាតាមស្តង់តាំងពិព័រណ៍ផលិតផលកសិកម្មខ្មែរនេះលោកសង្កេតឃើញថា ផលិតផលដែលបានដាក់តាំងគឺមានភាព​ជឿន​លឿនច្រើន ដែលក្នុងនោះមានការកែច្នៃរុក្ខជាតិដែលប្រជាកសិករខ្មែរបានឃើញ បានស្គាល់រាល់ថ្ងៃទៅជាផលិតផលបែបធម្មជាតិដែលមានផលប្រយោជន៍ជាច្រើនសម្រាប់ការរស់នៅប្រចាំថ្ងៃ។ លោកបន្តថា អ្វីដែលលោកបានឃើញ និងបានយល់ដឹងនៅក្នុងការតាំងពិព័រណ៍នេះ លោកនឹងនាំយកទៅផ្សព្វផ្សាយដល់កសិករនៅក្នុងភូមិ ស្រុករបស់លោក​ឱ្យរៀនសូត្រតាមដើម្បីឱ្យផលិតផលក្នុងស្រុកកាន់តែមានការគាំទ្រកាន់តែច្រើន។

បើតាមលោក គឹម រីន ផលិតផលខ្មែរដែលបានដាក់តាំងលក់ និងបង្ហាញក្នុងពិព័រណ៍កសិកម្មដែលធ្វើឡើងនៅមជ្ឈមណ្ឌលពិព័រណ៍កោះពេជ្យនេះគឺជាភស្តុតាងមួយដែលបង្ហាញថាផលិតផលកសិកម្មដែលខ្មែរផលិតបានគឺអាចប្រកួតប្រជែងជាមួយផលិតផលកសិកម្មរបស់ប្រទេសជិតខាងបាន ទាំងគុណភាព និងតម្លៃ៕