ដោយ៖ កែវ រតនៈ

ព្រឹត្តិការណ៍កសិកម្មដ៏ធំបំផុតដំបូងបង្អស់នៅកម្ពុជានេះដឹកនាំរៀបចំដោយក្រសួងកសិកម្ម រុក្ខាប្រមាញ់ និងនេសាទ(MAFF) មានការចូលរួមបើកពីលោកបណ្ឌិតសភាចារ្យ អ៊ុក រ៉ាប៊ុន ទេសរដ្ឋមន្រ្តីទទួលបន្ទុកបេសក កម្មពិសេស ប្រធានក្រុមប្រឹក្សាស្ដារ អភិវឌ្ឍន៍វិស័យកសិកម្ម និងជនបទ តំណាងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា លោក ហែម វណ្ណឌី រដ្ឋមន្ត្រីក្រសួងឧស្សាហកម្ម បច្ចេកវិទ្យា និងនវានុវត្តន៍, លោក ហួត ហាក់ រដ្ឋមន្ត្រីក្រសួងទេសចរណ៍ ថ្នាក់ដឹកនាំក្រសួងកសិកម្ម អង្គការស្បៀង និងកសិកម្មនៃសហប្រជាជាតិ (FAO)និងដៃគូសហការនានា។

ក្រៅពីការដាក់តាំងបង្ហាញផលិតផលកសិផលជាង៤០០ស្តង់ ពិព័រណ៍កសិកម្មនេះ ក៏មានកិច្ចពិភាក្សាតុមូលដែលចូលរួមដោយវាគ្មិនកិត្តិយសល្បីឈ្មោះពីស្ថាប័នរដ្ឋ សមាគម ក្រុមហ៊ុនឯកជនផ្នែកកសិកម្មដោយពិភាក្សា លើប្រធានបទជាច្រើនខាងផ្នែកកសិកម្ម ពិសេសបញ្ហាដែលកំពុងកើតមានក្នុងវិស័យមួយនេះថែមទៀត ផង។

ព្រឹត្តិការណ៍ CAFE25 រួមបញ្ចូលវេទិកាពិភាក្សាពីកសិកម្មកម្រិត​ខ្ពស់​រយៈពេល​ពីរថ្ងៃ និងពិព័រណ៍កសិកម្មរយៈពេលបួនថ្ងៃ ចាប់ពីថ្ងៃទី១៣ ដល់ថ្ងៃទី១៦ ខែវិច្ឆិកា ឆ្នាំ២០២៥ នៅអគារ E&F និងមជ្ឈមណ្ឌលសន្និបាត​និងពិព័រណ៍កោះពេជ្រ រាជធានីភ្នំពេញ។

ក្រៅពីផ្តល់ឱកាសដល់អ្នកចូលរួមក្នុងការទំនាក់ទំនងដោយផ្ទាល់ជាមួយថ្នាក់ដឹកនាំ និងមន្ត្រីរាជរដ្ឋាភិបាល វិនិយោគិនក្នុងស្រុក និងក្រៅស្រុក និងអ្នកជំនាញអាជីវកម្មកសិកម្មនានា ព្រឹត្តិការណ៍ CAFE25 ក៏មានកម្មវិធីទស្សនកិច្ចរបស់កសិករជាង ៨,០០០នាក់នៅទូទាំងប្រទេស ដើម្បីចូលរួមទស្សនាពិព័រណ៍ដោយផ្ទាល់ផងដែរ ៕