ដោយ៖ សំនៀង

ក្រសួងការងារ និងបណ្តុះបណ្តាលវិជ្ជាជីវៈ នឹងរៀបចំ “ពិព័រណ៍ការងារ សន្តិសុខសង្គម និងបណ្តុះបណ្តាលវិជ្ជាជីវៈ សម្រាប់បងប្អូនអតីតពលករដែលត្រឡប់មកពីប្រទេសថៃ” នៅតាមបណ្តាខេត្តចំនួន៣ នៅក្នុងខែវិច្ឆិកានេះ។ នេះបើតាមរយៈចេសក្ដីជូនដំណឹងរបស់ក្រសួងការងារ និងបណ្តុះបណ្តាលវិជ្ជាជីវៈ បានចេញផ្សាយនៅថ្ងៃទី១០ ខែវិច្ឆិកា ឆ្នាំ២០២៥។

បើតាមសេចក្តីជូនដំណឹងខាងលើពិព័រណ៍ការងារ សន្តិសុខសង្គម និងបណ្តុះបណ្តាលវិជ្ជាជីវៈ នេះ នឹងត្រូវរៀបចំឡើងក្នុងរយៈពេល២ថ្ងៃសម្រាប់ខេត្តនីមួយៗ ដែលក្នុងនោះខេត្តបាត់ដំបង នឹងត្រូវរៀបចំឡើងនៅថ្ងៃទី១៥-១៦ ខេត្តបន្ទាយមានជ័យ ធ្វើឡើងចាប់ពីថ្ងៃទី២២-២៣ ខែវិច្ឆិកា ឆ្នាំ២០២៥ និងខេត្តសៀមរាបគឺចាប់ពីថ្ងៃទី២៩-៣០ ខែវិច្ឆិកា ឆ្នាំ២០២៥។

សេចក្ដីជូនដំណឹងដដែលនេះបានបន្តឱ្យដឹងថា ពិព័រណ៍ការងារ សន្តិសុខសង្គម និងបណ្តុះបណ្តាលវិជ្ជាជីវៈ សម្រាប់បងប្អូនអតីតពលករដែលត្រឡប់មកពីប្រទេសថៃនេះ រៀបចំឡើងក្នុងគោលបំណងសំខាន់ៗចំនួន៣ គឺ១. បង្កើតជាវេទិកាជំនួបដ៏ធំរវាងអ្នកស្វែងរកការងារ និងនិយោជក ដើម្បីដាក់ពាក្យស្វែងរកការងារ ជ្រើសរើសបុគ្គលិក សម្ភាសភ្លាម និងទទួលបានការងារភ្លាមនៅហ្នឹងកន្លែង ទី២. បង្កើនការយល់ដឹងបន្ថែមអំពីអត្ថប្រយោជន៍នៃរបបសន្តិសុខសង្គម (ប.ស.ស.) សម្រាប់កម្មករ និយោជិតនៅពេលចូលបម្រើការងារនៅក្នុងស្រុក និង៣. ផ្សព្វផ្សាយ និងចុះឈ្មោះចូលរៀនវគ្គអប់រំបណ្តុះបណ្តាលបច្ចេកទេស និងវិជ្ជាជីវៈ។

ពិព័រណ៍ការងារនេះ នឹងមានសហគ្រាស ក្រុមហ៊ុន រោងចក្រ អ្នកផ្តល់ការអប់រំបណ្ដុះបណ្តាល និងសមាគម ចូលរួមផ្សព្វផ្សាយ និងដាក់តាំងបង្ហាញសមិទ្ធផលវគ្គអប់រំបណ្តុះបណ្តាល និងព័ត៌មានឱកាសការងារដែលមានតម្រូវការជ្រើសរើសកម្លាំងពលកម្មរាប់ម៉ឺនកន្លែង ដោយមានការសម្ភាសជ្រើសរើសបុគ្គលិកដោយផ្ទាល់នៅហ្នឹងកន្លែង។ សម្រាប់អ្នកចូលរួមនឹងអាចទទួលបានការកាត់សក់ អាហារ ភេសជ្ជៈ និងអាវយឺត ដោយឥតគិតថ្លៃផងដែរ៕