ដោយ៖ កែវ រតនៈ

ក្នុងជំនួបជាមួយអ្នកសារព័ត៌មានកាលពីថ្ងៃទី២៨ ខែតុលា ឆ្នាំ២០២៥ លោកជំទាវអ៊ឹម រចនា អនុរដ្ឋលេខាធិការក្រសួងកសិកម្ម បានថ្លែងថា វេទិកា និងពិព័រណ៍កសិកម្មកម្ពុជា (CAFE25)ដែលប្រារព្ធធ្វើនៅមជ្ឈ​មណ្ឌល​​​ពិព័រណ៍កោះពេជ្យ ចាប់ពីថ្ងៃទី១៣ដល់ថ្ងៃទី១៦ ខែវិច្ឆិកា ឆ្នាំ២០២៥នេះ មានស្ដង់ប្រមាណ៤០០ ត្រូវបានគ្រោងនឹងដាក់បង្ហាញនូវផលិតផលកសិកម្ម និងកសិផលនានាដោយផ្ដោតលើផលិតផលកសិកម្មចំនួន ៩មុខ រួមមានស្រូវអង្ករ ស្វាយចន្ទី កៅស៊ូ ដំឡូងមី ស្វាយ បន្លែ ត្រី ម្រេច និងផលិតផលឈើប្រើប្រាស់ប្រកបដោយចីរភាព។ ហើយគិតត្រឹមថ្ងៃទី២៨ខែតុលានេះ មានស្ដង់ចំនួន៣៥០ ត្រូវបានកក់ទុកដោយម្ចាស់អាជីវកម្ម។

លោកជំទាវបន្តថា CAFE25 មិនគ្រាន់តែជាពិព័រណ៍ធម្មតានោះទេ តែជាឱកាសសម្រាប់តួអង្គក្នុងខ្សែច្រវាក់តម្លៃ ជួបជជែកគ្នាពីបញ្ហាប្រឈម និងរកដំណោះស្រាយរួមជាមួយគ្នា ដែលអាចនឹងឈានដល់ការចុះកិច្ចសន្យាពាណិជ្ជកម្មជាមួយគ្នាថែមទៀត។

បើតាមលោកជំទាវ អ៊ឹម​ រចនា,  រយៈពេល២ថ្ងៃដំបូង មានការរៀបចំវេទិកាជជែកលើប្រធានបទជាច្រើនក្នុងវិស័យកសិកម្ម ក្រោមវត្តមានរបស់ថ្នាក់ដឹកនាំសំខាន់ៗនៃក្រសួងពាក់ព័ន្ធ។ ក្រៅពីផ្តល់ឱកាសដល់អ្នកចូលរួមក្នុងការទំនាក់ទំនងដោយផ្ទាល់ជាមួយថ្នាក់ដឹកនាំ និងមន្ត្រីរាជរដ្ឋាភិបាល វិនិយោគិនក្នុងស្រុក និងក្រៅស្រុក និងអ្នកជំនាញអាជីវកម្មកសិកម្មនានា ក៏មានកម្មវិធីទស្សនកិច្ចរបស់កសិករជាង ៨,០០០នាក់នៅទូទាំងប្រទេស នឹងត្រូវបានសម្របសម្រួលដើម្បីចូលរួមទស្សនាពិព័រណ៍ដោយផ្ទាល់ផងដែរ៕