អត្ថបទ៖ កែវ រតនៈ

សេចក្តីជូនដំណឹងរបស់ក្រសួងការងារ និងបណ្ដុះបណ្តាលវជ្ជាជីវៈ ដែលចេញនៅថ្ងៃទី ២០ ខែមីនា ឆ្នាំ ២០២៤  នេះបានសរសេរថា​ យោងតាមដីកាសម្រេចរឹបអូសជាបណ្ដោះអាសន្នលេខ ១៦៦ “ថ” ដ.រ ចុះថ្ងៃទី១២ ខែមីនា ឆ្នាំ២០២៤ របស់ សាលាដំបូងរាជធានីភ្នំពេញ ស្ដីពីការរឹបអូសជាបណ្តោះអាសន្ន នូវទ្រព្យសម្បត្តិ និងសម្ភារ​​​របស់ ក្រុមហ៊ុន វ៉ាយ & ដាប់បែលយូ ហ្គាមេន (Y & W GARMENT CO., LTD.) មានទីតាំងស្ថិតនៅផ្លូវ២១៧ ភូមិព្រែកជ្រៃ សង្កាត់ ស្ពានថ្ម ខណ្ឌដង្កោ រាជធានីភ្នំពេញ និងដោយមានការតម្កល់ប្រាក់កក់របស់អ្នកដេញថ្លៃតាមនីតិវិធីដេញថ្លៃ ទ្រព្យសម្បត្តិ និងសម្ភាររបស់ក្រុមហ៊ុននោះ ក្រសួងការងារ និងបណ្តុះបណ្តាលវិជ្ជាជីវៈ មានថវិកាដែលអាចបើកផ្តល់ប្រាក់ឈ្នួល និងប្រាក់បំណាច់ផ្សេងៗជូនកម្មករនិយោជិត។

ក្នុងសេចក្តីជូនដំណឹង ក្រសួងតម្រូវឱ្យកម្មករនិយោជិត ទៅសាលាខណ្ឌដង្កោ ដែលមានអាសយដ្ឋាន ផ្លូវ២១៧ ភូមិថ្មី សង្កាត់ដង្កោ ខណ្ឌដង្កោ រាជធានីភ្នំពេញ ចាប់ពីម៉ោង ៨ព្រឹក ថ្ងៃសៅរ៍ ទី២៣ ខែមីនា ឆ្នាំ២០២៤ នេះតទៅ តាមបញ្ជីឈ្មោះ និងលេខរៀងដែលក្រសួងនឹងបិតនៅសាលាខណ្ឌដង្កោ នៅព្រឹកថ្ងៃទី២៣ ខែមីនា មុនបើកផ្តល់​​ ដោយភ្ជាប់ជាមួយនូវឯកសារមួយចំនួនដូចជា ១. ប័ណ្ណសម្គាល់ខ្លួនកម្មករនិយោជិត (ច្បាប់ដើម) ឬកិច្ចសន្យាការងារ និងសៀវភៅការងារកម្មករ និយោជិត ឬប័ណ្ណសមាជិក ប.ស.ស. ឬអត្តសញ្ញាណប័ណ្ណសញ្ជាតិខ្មែរ ឬលិខិតឆ្លងដែន  ២. ប័ណ្ណបើកប្រាក់ឈ្នួលប្រចាំខែរបស់កម្មករនិយោជិតម្នាក់ៗ (បើមាន)។

កម្មករ​និយោជិត​នៅ​ក្រុមហ៊ុន​វ៉ាយ&​ដាប់បែលយូ​ហ្គាមេន ​(Y&W Garment Co. Ltd) ដែល​ផលិត​សម្លៀកបំពាក់​ទារក​និង​កុមារ ​ក្នុង​ខណ្ឌ​ដង្កោ ​បាន​ចេញ​តវ៉ា​ទាមទារ​រក​ដំណោះស្រាយ បន្ទាប់ពី​ថៅកែ​ជនជាតិ​ចិន​មិន​បាន​បើក​ប្រាក់​ឈ្នួល និង​ប្រាក់​អត្ថប្រយោជន៍​ផ្សេងៗ​ជូន​កម្មករ​ជាង​៤ពាន់​នាក់ ហើយបាន​រត់​ចោល​រោងចក្រ ដោយ​មិន​បាន​ជូន​ដំណឹង៕

រូបភាពៈ(បណ្ដាញសង្គម)