ដោយ៖ កែវ រតនៈ

ឯកឧត្តមបណ្ឌិត ហេង សុផាន់ណារិទ្ធ អគ្គនាយកបេឡាជាតិសន្តិសុខសង្គមស្តីទី នៃក្រសួងការងារ និងបណ្តុះបណ្តាល​វិជ្ជាជីវៈ នៅថ្ងៃទី២ ខែមីនា ឆ្នាំ២០២៦នេះ បានអញ្ជើញដឹកនាំកិច្ចប្រជុំបូកសរុបលទ្ធផលការងារប្រចាំ​ខែកុម្ភៈ និងលើកទិសដៅការងារបន្តរបស់នាយកដ្ឋានរដ្ឋបាល និងគ្រប់គ្រងធនធានមនុស្ស នៃ ប.ស.ស.។

ក្នុងឱកាសនោះ ឯកឧត្តមបណ្ឌិតអគ្គនាយកស្តីទី បានផ្តល់អនុសាសន៍ណែនាំ និងជំរុញឱ្យថ្នាក់ដឹកនាំ មន្ត្រី និងបុគ្គលិកទាំងអស់នៃនាយកដ្ឋានរដ្ឋបាល និងគ្រប់គ្រងធនធានមនុស្ស ត្រូវយកចិត្តទុកដាក់អនុវត្តទិសដៅការងារបន្តឱ្យមានប្រសិទ្ធភាពខ្ពស់ ជាពិសេសត្រូវខិតខំពង្រឹងការគោរពវិន័យ បទបញ្ជាផ្ទៃក្នុង សន្តិសុខ សណ្តាប់ធ្នាប់ អនាម័យ និងការថែទាំអគារ ដើម្បីបង្កើនបរិយាកាសការងារឱ្យកាន់តែស្អាត និងមានសុវត្ថិភាព។ បន្ថែមពីនេះ ត្រូវពិនិត្យមើលទម្រង់លិខិតបទដ្ឋានគតិយុត្ត និងសេចក្តីណែនាំផ្សេងៗ ឱ្យស្របតាមការចង្អុលបង្ហាញរបស់ថ្នាក់ដឹកនាំអង្គភាព និងក្រសួង។

ឯកឧត្តមបណ្ឌិតអគ្គនាយកស្តីទី បានសម្តែងនូវក្តីសង្ឃឹម និងជឿជាក់ថា ថ្នាក់ដឹកនាំ មន្ត្រី និងបុគ្គលិកទាំង​អស់ នឹងបន្តខិតខំប្រឹងប្រែងបំពេញតួនាទីភារកិច្ចរៀងៗខ្លួន ដោយស្មារតីទទួលខុសត្រូវខ្ពស់ ដើម្បីសម្រេច​​បាននូវសមិទ្ធផលថ្មីៗបន្ថែមទៀតជូនស្ថាប័ន។

សូមបញ្ជាក់ថា កិច្ចប្រជុំខាងលើនេះ ត្រូវបានរៀបចំឡើងនៅស្នាក់ការកណ្តាល ប.ស.ស. រាជធានីភ្នំពេញ ដោយមានការចូលរួមពី លោក លោកស្រី ប្រធាន អនុប្រធាននាយកដ្ឋាន លោក លោកស្រី ប្រធាន អនុប្រធានការិយាល័យ នៃនាយកដ្ឋានរដ្ឋបាល និងគ្រប់គ្រងធនធានមនុស្ស សរុបប្រមាណជាង ២០នាក់៕

 រូបភាព៖ប.ស.ស.