ភ្នំពេញ – ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានថ្លែងថា ម៉ាស៊ីនថត និងស្លាបប៉ាកកា គឺជាអាវុធដ៏មុតស្រួចក្នុងសមរភូមិព័ត៌មាន ជាពិសេសក្នុងអំឡុងពេលមានការផ្ទុះសង្គ្រាមរវាង កម្ពុជា–ថៃ ដែលបង្កឡើងដោយក្រុមយោធាថៃ។

តាមរយៈការបង្ហោះលើបណ្តាញសង្គមហ្វេសប៊ុក ឯកឧត្តម នេត្រ ភក្ត្រា បានលើកឡើងថា ការពិតតាមរយៈ កញ្ចក់ម៉ាស៊ីនថត និងស្លាបប៉ាកកា បានអនុញ្ញាតឱ្យអ្នកសារព័ត៌មានចុះទៅយកព័ត៌មានដោយផ្ទាល់នៅតំបន់រងគ្រោះ ក្នុងខេត្ត ឧត្តរមានជ័យ បាត់ដំបង និងបន្ទាយមានជ័យ ដែលជាទីតាំងរងការវាយប្រហារដោយគ្រាប់ផ្លោងធុនធ្ងន់ និងការទម្លាក់គ្រាប់បែកពីយោធាថៃ ក្នុងអំឡុងពេល ២១ថ្ងៃនៃសង្គ្រាមឈ្លានពានលើបូរណភាពទឹកដីកម្ពុជា។

ឯកឧត្តមបានបន្តថា ក្នុងអំឡុងពេលសង្គ្រាមរយៈពេល ២១ថ្ងៃ នេះ អ្នកសារព័ត៌មានបានដើរតួនាទីយ៉ាងសកម្ម និងសំខាន់ខ្លាំងណាស់ ក្នុងការនាំយកព័ត៌មានពិត បច្ចុប្បន្នភាព និងមានមូលដ្ឋានពិតប្រាកដ ជូនដល់ប្រជាពលរដ្ឋទូទាំងប្រទេស។ ព្រមជាមួយគ្នានេះ អ្នកសារព័ត៌មានក៏បាន ប្រឆាំងនឹងព័ត៌មានក្លែងក្លាយ និងសង្គ្រាមព័ត៌មាន ដែលត្រូវបានផ្សព្វផ្សាយដោយប្រទេសជិតខាង ដើម្បីការពារសេចក្តីពិត និងបូរណភាពព័ត៌មានរបស់កម្ពុជា។

ឯកឧត្តមបានសង្កត់ធ្ងន់ថា ម៉ាស៊ីនថត និងស្លាបប៉ាកកា មិនត្រឹមតែជាឧបករណ៍បញ្ជូនព័ត៌មានប៉ុណ្ណោះទេ ប៉ុន្តែជាអាវុធដ៏មានប្រសិទ្ធភាព ក្នុងការបង្ហាញការពិត និងការពារអធិបតេយ្យភាពព័ត៌មានរបស់ជាតិ ក្នុងសមរភូមិព័ត៌មានអន្តរជាតិ។

ក្រោមការដឹកនាំ និងសម្របសម្រួលរបស់ ក្រសួងព័ត៌មាន អ្នកសារព័ត៌មានជាតិ និងអន្តរជាតិ បានចុះទៅយកព័ត៌មានដោយផ្ទាល់នៅទីតាំងនានា ដែលមានការទម្លាក់គ្រាប់ពីយោធាថៃចូលមកក្នុងតំបន់សំខាន់ៗរបស់កម្ពុជា។

ជាមួយគ្នានេះដែរ ឯកឧត្តមរដ្ឋមន្ត្រី បានថ្លែងអំណរគុណចំពោះ អាជ្ញាធរពាក់ព័ន្ធទាំងអស់ ដែលបានផ្តល់ការសហការយ៉ាងល្អ ក្នុងការជួយសម្របសម្រួលដល់ការងារចុះយកព័ត៌មានរបស់អ្នកសារព័ត៌មាន ក្នុងអំឡុងពេលមានសង្គ្រាមឈ្លានពានលើបូរណភាពទឹកដីកម្ពុជា។

ឯកឧត្តមបានសង្កត់ធ្ងន់ថា ការពិតត្រូវបានលាតត្រដាង តាមរយៈម៉ាស៊ីនថត និងស្លាបប៉ាកកា ដែលជាអាវុធដ៏មុតស្រួច និងមានប្រសិទ្ធភាពបំផុតរបស់អ្នកកាសែត ក្នុងសមរភូមិព័ត៌មាន៕