អត្ថបទ៖ សំនៀង

លោក សុខ ណារ៉េត អភិបាលនៃគណៈអភិបាលស្រុក​ក្រឡាញ់​ និងអង្គការទស្សនៈពិភពលោកអន្ដរជាតិ នៅកម្ពុជា បាននាំយកគ្រាប់ពូជ និងសម្ភារៈសម្រាប់សួនបន្លែ ប្រគល់ជូនដល់ការិយាល័យកសិកម្មស្រុក

ក្រឡាញ់ និងរដ្ឋបាលឃុំ ព្រមទាំងគណៈកម្មការគ្រប់គ្រងមណ្ឌលសុវត្ថិភាពសម្រាប់ជនភៀសសឹក នៅ​តាមមណ្ឌលសុវត្ថិភាព ចំនួន ១០ ទីតាំងនៅក្នុងស្រុកក្រឡាញ់ ខេត្តសៀមរាប ក្នុងគោលបំណង រួមចំណែកជាមួយរាជរដ្ឋាភិបាល លើកកម្ពស់ការដាំបន្លែចម្រុះ នៅមណ្ឌលសុវត្ថិភាព​សម្រាប់ជនភៀស​សឹក ដើម្បីផ្គត់ផ្គង់អាហារ ដែលមានជីវជាតិពីបន្លែចម្រុះ រយៈពេលវែង ក្នុងគ្រាមានអាសន្ន ដល់ជនភៀសឹក ជាពិសេសកុមារ ដែលរងផលប៉ះពាល់ពីសង្រ្គាមឈ្លានពានព្រំដែន កម្ពុជា- ថៃ នាថ្ងៃទី៥​ ខែមករា​ ឆ្នាំ២០២៦​។

តាមរដ្ឋបាលខេត្តសៀមរាបបានឱ្យដឹងថា គ្រាប់ពូជ និងសម្ភារៈសម្រាប់សួនបន្លែ​ ដែលប្រគល់​ជូន​ដល់​រដ្ឋបាលស្រុក និង រដ្ឋបាលឃុំ ព្រមទាំងគណៈកម្មការគ្រប់គ្រងមណ្ឌលសុវត្ថិភាពសម្រាប់ជនភៀសសឹក ទាំងនោះមាន ស្ពៃតឿ ស្ពៃក្រញាញ់  ត្រកួន  ផ្ទី  អំពូលសូឡា ២០ ផ្ទាំង ធុងស្រោចដំណាំ ចំនួន ៤០  ស្បៃ គ្រប់ការពារ និងកាត់បន្ថយកំដៅ កៅស៊ូរ ថ្លាសម្រាប់ស្ដុកទឹក។

សង្គ្រាមឈ្លានពានរបស់យោធាថៃមកលើអធិបតេយ្យកម្ពុជាបានធ្វើឱ្យពលរដ្ឋកម្ពុជាប្រមាណជាងកន្លះលាននាក់ត្រូវរត់ភៀសសឹក ចាកចោលផ្ទះសំបែងទីរកទីសុវត្ថិភាព ព្រមទាំងបានបំផ្លិចបំផ្លាញហេដ្ឋារចនា​សម្ព័ន្ធស៊ីវិលមានដូចជា ផ្លូវថ្នល់ ស្ពាន សាលារៀន មន្ទីរពេទ្យ និងផ្ទះរបស់​ប្រជាពល​រដ្ឋដែលរស់នៅតាម​តំបន់បន្ទាត់ព្រំដែន៕