អត្ថបទ៖ វិចិត្រ

តាមរយៈសេចក្តីជូនដំណឹងរបស់ក្រសួងព័ត៌មាន ស្តីពីសន្និសីទសារព័ត៌មានផ្សព្វផ្សាយរបាយការណ៍ស្តីពី “ស្ថានភាពសេរីភាពសារព័ត៌មាននៅកម្ពុជាឆ្នាំ២០២៥” ចុះថ្ងៃទី២៩ ខែមេសា ឆ្នាំ២០២៥ឱ្យដឹងថា ក្រសួងនឹងរៀបចំសន្និសីទសារព័ត៌មាន ដើម្បីផ្សព្វផ្សាយរបាយការណ៍ស្តីពី «ស្ថានភាព សេរីភាពសារព័ត៌មាននៅកម្ពុជាឆ្នាំ២០២៥» នៅថ្ងៃទី៣០ ខែមេសា ឆ្នាំ២០២៥ វេលាម៉ោង ៣:៣០ នាទីរសៀល នៅសាលសវនាការវាំងឈើ នៃទីស្តីការក្រសួងព័ត៌មាន ក្រោមអធិបតីភាព ឯកឧត្តម នេត្រ ភក្ត្រា រដ្ឋមន្ត្រី ក្រសួងព័ត៌មាន។

សេចក្តីជូនជូនដំណឹងខាងលើឱ្យដឹងបន្ថែមថា នៅក្នុងសន្និសីទសារព័ត៌មាននោះ អ្នកសារព័ត៌មាននឹងទទួលបានព័ត៌មាន និងស្វែងយល់ឱ្យបានស៊ីជម្រៅ អំពីដំណើរការរៀបចំរបាយការណ៍ និងលទ្ធផលនៃការស្ទង់មតិអ្នកសារព័ត៌មានទូទាំងប្រទេសស្តីពីស្ថានភាព សេរីភាពសារព័ត៌មាននៅកម្ពុជាឆ្នាំ២០២៥។

តាមរបាយការណ៍នៃការសិក្សាស្រាវជ្រាវរបស់ក្រសួងព័ត៌មានកាលពីឆ្នាំ២០២៤ បញ្ជាក់ថា ស្ថានភាពសេរីភាពសារព័ត៌មាននៅកម្ពុជាមានភាពល្អប្រសើរ ដោយក្នុងនោះ ៧៩,៨% ថាសេរីភាពសារព័ត៌មាននៅកម្ពុជាមានភាពល្អប្រសើរ ៧១% ថាសេរីភាពសារព័ត៌មាននៅកម្ពុជាមានស្ថានភាពល្អ និង ៨,៨% ថាសេរីភាពសារព័ត៌មានមានស្ថានភាពល្អបំផុត ក្នុងចំណោមអ្នកឆ្លើយចំនួន៣៤១នាក់៕