អត្ថបទ៖ វិចិត្រ

រាជរដ្ឋាភិបាល នៅថ្ងៃទី២៨ ខែមេសាឆ្នាំ២០២៥ បានសម្រេចចេញអនុក្រឹត្យបន្ថែមរបបសន្តិសុខសង្គម សម្រាប់អតីតមន្ត្រីរាជការស៊ីវិល និងអតីតយុទ្ធជន ក្នុងម្នាក់២ម៉ឺនរៀល។

ខ្លឹមសារនៃអនុក្រឹត្យខាងលើចែងថា អតីតមន្ត្រីរាជាការស៊ីវិល និងអតីតយុទ្ធជនដែលបានចូលនិវត្តន៍មុនឆ្នាំ២០២៤ ត្រូវបានបន្ថែមរបបសន្តិសុខសង្គមប្រចាំខែចំនួន២ម៉ឺនរៀល ក្នុងម្នាក់។ ចំពោះអតីតមន្ត្រីរាជការស៊ីវិល ​និងអតីតយុទ្ធជនដែលមានរបបសន្តិសុខសង្គមប្រចាំខែទាបជាង ៨៤៥០០០៛ ត្រូវដំឡើងឱ្យដល់ ៨៤៥០០០៛។  

ខ្លឹមសារនៃអនុក្រឹត្យដដែលនេះក៏បានបញ្ជាក់ឱ្យដឹងថា ការបន្ថែមរបបសន្តិសុខសង្គមនេះគឺត្រូវអនុវត្តចាប់ពីថ្ងៃទី១ ខែមេសា ឆ្នាំ២០២៥ នេះទៅ។

គួបញ្ជាក់ថា កាលពីថ្ងៃទី ១៧ ខែមេសា ឆ្នាំ ២០២៤ សម្ដេចនាយកមន្ត្រី ហ៊ុន​ ម៉ាណែត បានចេញអនុក្រឹត្យ ស្តីពីការធ្វើសមាហរណកម្ម និងការដំឡើងរបបសន្តិសុខសង្គម សម្រាប់អតីតមន្ត្រីរាជការស៊ីវិល និងអតីតយុទ្ធជន ដោយកំណត់ របបសន្តិសុខសង្គមរបស់មន្ត្រីរាជការស៊ីវិល និងអតីតយុទ្ធជន ដែលមានកម្រិតទាបជាង ៨២៥​ ០០០ រៀល ត្រូវដំឡើងឱ្យដល់ ៨២៥​ ០០០ រៀល។​​

ចំណែកឯអតីតមន្ត្រីរាជការស៊ីវិល និងអតីតយុទ្ធជន ដែលបានចូលនិវត្តន៍មុនឆ្នាំ២០១៥ ត្រូវបានធ្វើសមាហរណកម្មទៅក្នុងប្រព័ន្ធរបបសន្តិសុខសង្គមថ្មី ដោយប្រើប្រាស់មូលដ្ឋាននៃការគណនារបបសន្តិសុខសង្គមប្រចាំខែ ផ្អែកលើប្រព័ន្ធបៀវត្ស ដែលត្រូវបានកែសម្រួល ក្រោយឆ្នាំ២០១៥ ជាគោល៕