ដោយ៖កែវ រតនៈ

លោក សុទ្ធ គឹមកុលមុនី  អ្នកនាំពាក្យ គណៈកម្មាធិការជាតិគ្រប់គ្រងគ្រោះមហន្តរាយបានប្រាប់បៃតងប៉ុស្តិ៍​ថា រហូតមកដល់ព្រឹកថ្ងៃទី២១ ខែវិច្ឆិកានេះ ជំ​​នន់ទឹកភ្លៀងបានស្រកចុះតិចតួចបំផុតហើយជំនន់ទឹកភ្លៀងនេះបានហូរទៅដល់ស្រុកកណ្ដៀងនៃខេត្តមួយនេះ បន្ទាប់ពីជន់លិចសង្កាត់ចំនួន៣ក្នុងក្រុងពោធិ៍សាត់។ លោក​​ឱ្យដឹងថាគិតត្រឹមល្ងាចថ្ងៃទី២០ ខែវិច្ឆិកា គឺប្រជាជនចំនួន​៣,៧៤២គ្រួសារ និងផ្ទះ៦៨៧ខ្នងបានប៉ះពាល់​​​ដល់ផ្ទៃដីទំហំស្រុក និងក្រុងចំនួន៤ ហើយប្រជាជនត្រូវបានជម្លៀសទៅទីទួលសុវត្ថិភាពចំ​នួន​២,៥៤៤គ្រួសារ​​។ បើតាម លោក សុទ្ធ គឹមកុលមុនី ក្រៅពីផ្ទះសម្បែង និងប្រជាជន ជំនន់ទឹកភ្លៀងនេះបានធ្វើឱ្យ​​ប៉ះពាល់ដល់ដំណាំស្រូវទំហំជាង២ពាន់ហិកតា។

យ៉ាងនេះក្តី​ លោក ឱ្យដឹងថា ជំនន់ទឹកភ្លៀងនៅខេត្តពោធិ៍សាត់នេះមិនបានធ្វើមានប្រជាជនបាត់ខ្លួន ឬស្លាប់នោះទេ ដោយគណៈកម្មាធិការជាតិគ្រប់គ្រងគ្រោះមហន្តរាយបាន សហការជាមួយអាជ្ញាធរខេត្តគ្រប់ជាន់ថ្នាក់ជួយសង្គ្រោះប្រជាជនទាន់ពេលវេលា និងបានត្រៀមលក្ខណៈទុកជាមុន។

បើតាម អភិបាលនៃគណៈអភិបាលខេត្តពោធិ៍សាត់ឯកឧត្តម ខូយ រីដា  ជំ​នន់ទឹកភ្លៀងនេះគឺកើតមានប​ន្ទាប់ពីមានភ្លៀងធ្លាក់ជាច្រើនថ្ងៃធ្វើឱ្យទឹកហូរមកពីស្ទឹងសំខាន់ៗចំ​នួន៣ចូលមកក្រុងពោធិ៍សាត់ព្រមៗគ្នា៕

រូបភាព៖​បណ្ដាញសង្គម