ដោយ៖ វិចិត្រ

ក្រសួងបរិស្ថាន នឹងរៀបចំវេទិកាកេសរកូលជាតិលើកទី៥ និងកម្មវិធីប្រកួតប្រជែងគំនូរកេសរកូល ក្រោមប្រធានបទ គុណតម្លៃកេសរកូលព្រៃចំពោះប្រព័ន្ធអេកូឡូស៊ី ប្រជាសហគមន៍ និងសេដ្ឋកិច្ច។ នេះបើតាមសេចក្តីប្រកាសព័ត៌មានរបស់ក្រសួងបរិស្ថានដែលបានចេញផ្សាយនៅថ្ងៃទី១១ ខែវិច្ឆិកានេះ។   

ព្រឹត្តិការណ៍នេះ នឹងប្រព្រឹត្តទៅនៅថ្ងៃទី២៦ ខែវិច្ឆិកា ឆ្នាំ២០២៥ នៅក្នុងអគារមតកតេជោ ទីស្តីការក្រសួងបរិស្ថាន រាជធានីភ្នំពេញ។

បើតាមសេចក្តីប្រកាសព័ត៌មានខាងលើ វេទិកានេះនឹងមានការតាំងបង្ហាញពីប្រភេទកេសរកូលព្រៃ កេសរកូលបង្កាត់ ប្រភេទប្រទាល និងរុក្ខជាតិលម្អ រួមទាំងផលិតផលជីវៈចម្រុះជាច្រើនផ្សេងទៀត ដើម្បីផ្សព្វផ្សាយ និងលើកកម្ពស់ការយល់ដឹងអំពីនានាភាពនៃប្រភេទកេសរកូលព្រៃកម្ពុជា ប្រភេទប្រទាល និងរុក្ខជាតិលម្អ របៀបដាំដុះ និងថែទាំ ព្រមទាំងគុណតម្លៃ និងអត្ថប្រយោជន៍នៃរុក្ខជាតិទាំងនោះនៅក្នុងប្រព័ន្ធអេកូឡូស៊ី សំដៅលើកកម្ពស់ការស្រលាញ់ ការចូលរួមអភិរក្សជីវៈចម្រុះពីគ្រប់ភាគីពាក់ព័ន្ធ លើកកម្ពស់សេដ្ឋកិច្ចជាតិ និងជីវភាពសហគមន៍តំបន់ការពារធម្មជាតិ ស្របនឹងយុទ្ធសាស្រ្តចក្រាវិស័យបរិស្ថាន ដែលបានដាក់ចេញផ្តោតលើសសរស្ដម្ភ ចំនួន៣គឺ ភាពស្អាត ភាពបៃតង និងចីរភាព។

ក្នុងនោះក៏នឹងមានការប្រកួតគំនូរកេសរកូលផងដែរ ហើយបេក្ខជន បេក្ខនារី អាចចូលរួមប្រកួតគំនូរកេសរកូលបាន តម្រូវឱ្យមានអាយុចាប់ពី ១៨ ដល់ ៣៥ ឆ្នាំ។ ចំពោះប្រភេទគំនូរសម្រាប់ចូលរួមប្រកួតគឺជាគំនូរពណ៌ទឹក ហើយគំនូរមានទំហំ A3។ សម្រាប់កាលបរិច្ឆេទផុតកំណត់ចូលរួមនៅថ្ងៃទី២០ ខែវិច្ឆិកា ឆ្នាំ២០២៥។

បេក្ខជន បេក្ខនារីដែលមានបំណងចូលរួមប្រកួត ត្រូវផ្ញើរូបថតគំនូរ ដែលបានគូររួចត្រូវមានគុណ ភាពច្បាស់ល្អ និងវីដេអូដំណើរការនៃការគូរ ចាប់ពីពេលចាប់ផ្តើមដល់បញ្ចប់ ទៅក្រុមការងារនាយកដ្ឋានជីវៈចម្រុះ នៃក្រសួងបរិស្ថាន៕