កាលពីថ្ងៃទី២៩ ខែកញ្ញា ឆ្នាំ២០២៥ លោក អ៊ឹង គឹមលាង អភិបាលរង នៃគណៈអភិបាលខេត្ត និងជាប្រធានលេខាធិការដ្ឋានគណៈកម្មាធិការគ្រប់គ្រងគ្រោះមហន្តរាយខេត្ត បានដឹកនាំក្រុមការងារ មន្ទីរសាធារណការ និងដឹកជញ្ជូនខេត្ត រដ្ឋបាលក្រុងសៀមរាប ចុះពិនិត្យស្ថានភាពជំនន់ទឹកភ្លៀងបណ្តាលឱ្យលិចភូមិសាស្ត្រមួយចំនួននៅក្រុងសៀមរាប និងហូររំលងផ្លូវជាតិលេខ៦។

ជាមួយនឹងការចុះពិនិត្យនេះ​ ក៏បានយកគ្រឿងចក្រកាយបើកមុខទឹកនៅតាមប្រឡាយ ដើម្បីរំដោះការជន់លិចផ្លូវជាតិលេខ៦ចំណុចសង្កាត់ស្រង៉ែ និងកាយរំដោះការជន់លិចចម្ការឈើទាលអនុស្សាវរីយ៍កាកបាទក្រហមកម្ពុជា (ក្បែរសួនរុក្ខជាតិអង្គរ)ផងដែរ។

រដ្ឋបាលខេត្តសូមអំពាវនាវដល់បងប្អូនប្រជាពលរដ្ឋទាំងអស់​ ដែលបានសាងសង់​ ឬចាក់អាចម៍ដីបំពេញក្បាលដីរបស់ខ្លួន​ សូមធ្វើការរៀបចំសាងសង់ប្រឡាយ​ ឬដាក់លូឱ្យបានត្រឹមត្រូវជៀសវាងការរាំងស្ទះផ្លូវទឹកហូរ។ ម្យ៉ាងទៀតក៏សូមអំពាវនាវដល់បងប្អូនប្រជាពលដ្ឋផងដែរ​អំពីការវេខ្ចប់សំរាម​ ឬចោលសំរាមក្នុងប្រព័ន្ធបង្ហូរទឹក​ ឬប្រឡាយដែលធ្វើឱ្យរាំងស្ទះមុខទឹកពុំអាចហូរបាននិងធ្វើឱ្យជន់លិចហេដ្ឋារចនាសម្ព័ន្ធ​ និងផ្ទះបងប្អូនប្រជាពលរដ្ឋ៕ ប្រភពរដ្ឋបាលខេត្តសៀមរាប