អត្ថបទ៖ កែវ​ រតនៈ

លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយបានប្រាប់សារព័ត៌មានបៃតងប៉ុស្តិ៍ថា  ប៉ុន្មានថ្ងៃចុងក្រោយនេះ កម្ពុជាបានរងឥទ្ធិពលព្យុះ ដែលធ្វើឱ្យមានភ្លៀងធ្លាក់ពីកម្រិតបង្គួរទៅច្រើន រាយប៉ាយទូទាំងប្រទេសហើយបានបង្កឱ្យមានជំនន់ទឹកភ្លៀងក្នុងខេត្តចំនួន៨របស់កម្ពុជា។ ខេត្តទាំង៨ដែលរងផលប៉ះពាល់ដោយសារជំនន់ទឹកភ្លៀងនោះរួមមានខេត្តកំពង់ធំ, ព្រៃវែង,បន្ទាយមានជ័យ, រតនគិរី, មណ្ឌលគិរី, ស្ទឹងត្រែង, ក្រចេះ និងសៀមរាប។ តែទោះជាយ៉ាងណាស្ថានភាពជំនន់នៅពេលនេះ មិនធ្ងន់ធ្ងរនោះទេ ហើយក៏មិនទាន់បង្កឱ្យមនុស្សស្លាប់ដែរ។

លោកបន្តថា ជារៀងរាល់ឆ្នាំ​គណៈកម្មាធិការជាតិគ្រប់គ្រងគ្រោះមហន្តរាយតែងតែត្រៀមពង្រឹងសមត្ថភាពដើម្បីឆ្លើយតបជាមួយគ្រោះមហន្តរាយផ្សេងៗ ជាពិសេសគឺគ្រោះទឹកជំនន់ដែលកើតមានឱ្យទាន់សភាពការណ៍រួមទាំងរៀបវិធានការដើម្បីកាត់បន្ថយគ្រោះមហន្តរាយនេះផងដែរ។

លោក សុទ្ធ គឹមកុលមុនី បន្ថែមថា ទឹកជំនន់តែងតែកើតឡើងនៅចន្លោះពីខែសីហា ដល់ខែតុលា​ ដោយ​ឡែក​ស​ម្រាប់ទឹកភ្លៀងភាគច្រើនគឺកើតឡើងនៅចន្លោះខែកញ្ញា​និងខែតុលា។

ហើយតាមលោក សុទ្ធ គឹមកុលមុនី គិតត្រឹមថ្ងៃទី ២៥ ខែកញ្ញា ជំនន់ទឹកភ្លៀង បានបង្កផលប៉ះពាល់ស្រុកចំនួន ២៥ ឬស្មើ ៧៧ឃុំ ស្ថិតក្នុងខេត្តចំនួន៨  រួមមាន កំពង់ធំ, ព្រៃវែង,បន្ទាយមានជ័យ, រតនគិរី, មណ្ឌលគិរី, ស្ទឹងត្រែង, ក្រចេះ និងសៀមរាប។ គ្រោះមហន្តរាយនេះ បានធ្វើឱ្យប៉ះពាល់ដល់ការរស់នៅរបស់ពលរដ្ឋ ៧ ៥០៣គ្រួសារ ក្នុងនោះ ៥គ្រួសារ ត្រូវបានអាជ្ញាធរជម្លៀសទៅទីទួលសុវត្ថិភាព និងប៉ះពាល់ផ្ទះ ៤ ៥៥៦ខ្នង។ ចំណែក ដំណាំស្រូវបានរងប៉ះពាល់ ៥ ០៤៧ហិកតា​ ក្នុងនោះខូច ១ ០៩៦ហិកតា, ប៉ះពាល់ដំណាំរួមផ្សំ ១ ៨៣២ហិកតា និងបាក់ច្រាំងចំនួន ២កន្លែង ស្មើនឹង ៨៦៥ម៉ែត្រ៕

រូបភាព៖ មន្ទីរព័ត៌មានខេត្តរតនគិរី