អត្ថបទ៖ វិចិត្រ

ក្រសួងបរិស្ថានរៀបចំប្រារព្ធទិវាសម្អាតពិភពលោកលើកទី៨ ដើម្បីបំផុសស្មារតីស្រលាញ់បរិស្ថានពីប្រជាពលរដ្ឋ ស្ថាប័នរដ្ឋ និងវិស័យឯកជនទាំងអស់ សំដៅឱ្យមានការចូលរួមគ្រប់គ្រងសំរាម សំណល់រឹង និងបញ្ជាបការយល់ដឹងអំពី ផលប៉ះពាល់នៃបរិមាណសំរាមលើភពផែនដី។

តាមរយៈសេចក្តីជូនដំណឹងចុះថ្ងៃទី១៥ ខែកញ្ញា ឆ្នាំ២០២៥ឱ្យដឹងថា ក្រសួងបរិស្ថាន សហការជាមួយក្រសួងអប់រំ យុវជន និងកីឡា ក្រសួងមហាផ្ទៃ ក្រសួងទេសចរណ៍ ក្រសួងពាណិជ្ជកម្ម ក្រសួងការងារ និងបណ្តុះបណ្តាលវិជ្ជាជីវៈ ក្រសួងធម្មការ និងសាសនា និងអង្គការ River Ocean Cleanup នឹងប្រារព្ធទិវាសម្អាតពិភពលោកលើកទី៨ ដែលនឹងប្រព្រឹត្តទៅចាប់ពីថ្ងៃទី១៥ ដល់ថ្ងៃទី២០ ខែកញ្ញា ឆ្នាំ២០២៥ នៅ ទូទាំងប្រទេស។

ទិវាសម្អាតពិភពលោកលើកទី៨ រៀបចំឡើងស្របតាមយុទ្ធសាស្ត្របញ្ចកោណ ដំណាក់កាលទី១ របស់រដ្ឋាភិបាល និងគាំទ្រដល់ការអនុវត្តយុទ្ធសាស្ត្រចក្រាវិស័យបរិស្ថាន ២០២៣-២០២៨ រួមមាន ភាពស្អាត បៃតង និងចីរភាព ព្រមទាំងរួមចំណែកដល់យុទ្ធនាការ “ផ្លូវជាតិស្អាត គ្មានសំណល់ប្លាស្ទិក” និងគោលដៅអភិវឌ្ឍន៍ប្រកបដោយចីរភាព (SDGs)៕