អត្ថបទ៖ កែវ រតនៈ

តាមរយៈទំព័រហ្វេស ប៊ុកផ្លូវការរបស់លោក ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទដែល​បានផ្សព្វផ្សាយនៅថ្ងៃទី ១០ ខែមីនា ឆ្នាំ២០២៥ បានបញ្ជាក់ថា បច្ចុប្បន្ននេះ ថ្លៃគ្រាប់ស្វាយចន្ទីសើមស្ថិត​ក្នុងចន្លោះ ៤៥០០៛-៥០០០៛ ក្នុងមួយគីឡូក្រាម ដែលជាថ្លៃល្អមួយ បើធៀបទៅនឹងឆ្នាំកន្លងទៅ សម្រាប់ស្តង់​​ដារដូវកាលប្រមូលផលធំខែមីនា និងអាចផ្តល់ផលចំណេញក្នុងរង្វង់ ៣-៤លានរៀលក្នុងមួយហិកតា អា​ស្រ័យ​​លើទិន្នផលទាបឬខ្ពស់។

លោកឃឹម ហ្វីណង់ ក៏បានស្នើសូមឱ្យផ្សព្វផ្សាយនូវព័ត៌មានដែលត្រឹមត្រូវ និងគ្រប់ជ្រុងជ្រោយ ជៀសវាងបង្កឱ្យមានការភ្ញាក់ផ្អើល និងភ័ន្តច្រលំដល់កសិករ ការចង់បានការចូលចិត្ត(Likes) និងចែករំលែក(Shares) តាមមធ្យោបាយបែបនេះ កំពុងធ្វើបាបដល់កសិករដោយផ្ទាល់ផងនិងប្រយោលផងទៅវិញទេ។ ចង់មិនចង់ នឹងធ្វើឱ្យមានការព្រួជាយបារម្ភដល់កសិករអ្នកដាំស្វាយចន្ទី និងអាចរឹតតែពិបាកដល់ពួកគេក្នុងការចរចាថ្លៃជាមួយអ្នកទិញ។

ការអះអាងដូចនេះរបស់ លោក ឃឹម ហ្វីណង់ ជាការឆ្លើយតបជាមួយអ្នកលេងបណ្ដាញសង្គមួយចំនួនដែលបាន​​ផ្សព្វផ្សាយថា​គ្រាប់ចន្ទីបានចុះថោករហូតដល់តម្លៃត្រឹមតែ ៣៥០០៛ក្នុងមួយគីឡូក្រាមនៅពេលដែលឈ្មួញ​​​ចុះទិញដល់ចម្ការ។

គិតត្រឹមឆ្នាំ២០២៤នេះ ប្រទេសកម្ពុជាមានផ្ទៃដីដាំដុះដំណាំស្វាយចន្ទីជាង ៥៨ម៉ឺនហិកតា នៅទូទាំងប្រទេស ដែល​​អាចផ្ដល់ទិន្នផលជាមធ្យមប្រមាណ ១,៥តោន ក្នុង ១ហិកតា។ នេះបើយោងតាមការចុះផ្សាយនៅលើបណ្តាញ​​​​សង្គមហ្វេសប៊ុកផ្លូវការរបស់សម្តេចធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជានាចក្រណាចក្រកម្ពុជា នៅថ្ងៃទី១២ ខែកញ្ញា ឆ្នាំ២០២៤។

នៅពេញមួយឆ្នាំ២០២៤ កន្លងទៅនេះ កម្ពុជាផលិតគ្រាប់ស្វាយចន្ទីបានជាង៨៥ម៉ឺនតោនមានការកើនឡើង​​២៦% បើធៀបនឹងឆ្នាំ២០២៣ ដោយបាននាំចេញទៅទីផ្សារអន្តរជាតិប្រមាណជាង៨១ម៉ឺនតោន ក្នុងនោះនាំចេញទៅទីផ្សារវៀតណាមជាង៧៩ម៉ឺនតោន ដោយគិតជាទឹកប្រាក់មានប្រមាណជាង១ពាន់១រយលានដុល្លារ កើនឡើង៣១%៕

 រូបភាព៖ បណ្ដាញសង្គម