អត្ថបទ៖ យូ​ វាសនា

កិច្ចប្រជុំដែលដឹកនាំដោយឯកឧត្តម សោម ចំណាន រដ្ឋលេខាធិការនៃក្រសួងការងារ និងបណ្តុះបណ្តាលវិជ្ជាជីវៈ​នេះធ្វើឡើងថ្ងៃទី២៧ ខែមីនា ឆ្នាំ២០២៥នេះ គឺដើម្បីពិភាក្សាអំពីផែនការអនុវត្តរបស់ក្រុមអធិការកិច្ចអន្តរ​ក្រសួងក្នុងវិស័យអាទិភាពទាំងបួន រួមមានវិស័យកម្មន្តសាលកាត់ដេរ ទេសចរណ៍ កសិកម្ម និងសំណង់ ក្នុងឆ្នាំ២០២៥ និងត្រួតពិនិត្យ វាយតម្លៃលើលទ្ធផលការងារ និងវឌ្ឍនភាពការងារនៃការចុះធ្វើអធិការកិច្ចអន្តរ​ក្រសួងក្នុងវិស័យកម្មន្ដសាលក្នុងឆ្នាំ២០២៤ដើម្បីទទួលយកធាតុចូលពីមន្រ្តីជំនាញដើម្បីឱ្យការធ្វើអធិការ​​កិច្ចកាន់តែមានសង្គតិភាពនិងប្រសិទ្ធភាពសម្រាប់ឆ្នាំ២០២៥។  សម្រាប់កិច្ចប្រជុំនេះមានការចូលរួមពីថ្នាក់ដឹកនាំ មន្ត្រីអធិការការងារ មន្រ្តីរាជការ នៃក្រសួងការងារ និងបណ្តុះបណ្តាលវិជ្ជាជីវៈ និងតំណាងក្រសួងបរិស្ថាន រួមទាំងតំណាងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្ដន៍ផងដែរ។

ឯកឧត្តម សោម ចំណានបានបញ្ជាក់ថា រាជរដ្ឋាភិបាលបានដាក់ចេញនូវវិធានការកែទម្រង់មុតស្រួចជាកញ្ចប់ សំដៅពង្រឹងភាពប្រកួតប្រជែង និងជំរុញការធ្វើពិពិធកម្មសេដ្ឋកិច្ចលើប្រធានបទចំនួន១៥ ក្នុងនោះប្រធានបទទី៦ ពាក់ព័ន្ធនឹង “ការពិនិត្យ និងរៀបចំជាបញ្ជីស្ថាប័ន និងពេលវេលាចុះពិនិត្យនៅតាមរោងចក្រ”។

ឯកឧត្តមបន្ថែមថា យោងតាមផែនការដែលបានឯកភាពជាឯកច្ឆន្ទ ការចុះធ្វើអធិការកិច្ចអន្តរក្រសួងក្នុងវិស័យកម្មន្តសាលនៅក្នុងឆ្នាំ២០២៤កន្លងទៅ គឺផ្តោតតែរោងចក្រ សហគ្រាសផ្នែកវាយនភណ្ឌ កាត់ដេរ ផលិតស្បែកជើង ផលិតផលធ្វើដំណើរ និងកាបូប នៅរាជធានីភ្នំពេញ។ ក្នុងពេញមួយឆ្នាំ២០២៤ មន្ត្រីអធិការកិច្ចអន្តរក្រសួងបានបំពេញភារកិច្ចរបស់ខ្លួនប្រកបដោយការទទួលខុសត្រូវ និងទទួលបានលទ្ធផលផ្លែផ្កាផង​ដែរ៕

រូបភាព៖ ក្រសួងការងារ