ដោយ៖ វិចិត្រ

ក្រសួងការពារជាតិកម្ពុជា តាមរយ:អ្នកនាំពាក្យ បានបដិសេធថា កម្ពុជាមិនបានប្រើប្រាស់អាវុធបាញ់ចូលទឹកដីថៃ ក្នុងន័យញុះញ៉ុងណាមួយដូចទៅនឹងការលើកឡើងរបស់កងទ័ពថៃ និងបណ្តាញសារព័ត៌មានថៃមួយចំនួដែលបានចុះផ្សាយឡើយ។

នៅរសៀលថ្ងៃទី២៣ ខែកញ្ញា នេះ ផេកហ្វេសប៊ុកផ្លូវការរបស់កងទ័ពថៃ និងបណ្តាញសារព័ត៌មានរបស់ថៃមួយចំនួនបានចុះផ្សាយថា “កងកម្លាំងកម្ពុជាបាញ់អាវុធធុនតូច ចំនួន៣ទៅ៥គ្រាប់ចូលទឹកដីថៃ ក្នុងគោលបំណងញុះញង់ នៅតំបន់តាមបណ្តោយព្រំដែន នៃប្រទេសទាំងពីរ”។

បញ្ជាក់នៅក្នុងសេចក្តីប្រកាសព័ត៌មានរបស់ខ្លួននៅយប់ថ្ងៃអង្គារនេះ អ្នកនាំពាក្យក្រសួងការជាតិកម្ពុជា ឧត្តមសេនីយ៍ឯក ម៉ាលី សុជាតា បានឱ្យដឹងថា "ដោយយោងតាមព័ត៌មានដែលទទួលបានពីយោធភូមិភាគទី៤ របស់កម្ពុជា បានបញ្ជាក់ថា អង្គភាពដែលបានឈរជើងនៅតំបន់នោះបានរៀលកៃ ដោយអចេតនា ចំនួន២គ្រាប់ នៅវេលាម៉ោង ១៣:២០ នាទីរសៀល ហើយនៅវេលាម៉ោង ១៤:១៦ នាទីរសៀល ក្រុមទំនាក់ទំនងនៃប្រទេសទាំងពីរបានសាកសួរ និងផ្តល់ព័ត៌មាន ដើម្បីដោះស្រាយជាមួយគ្នារួចហើយអំពីបញ្ហានេះ។"

ក្នុងនោះកម្ពុជាក៏បញ្ជាក់ពីការប្តេជ្ញាចិត្តរបស់ខ្លួននៅក្នុងការសហការជាមួយភាគីថៃនៅគ្រប់កម្រិត ដើម្បីលើកកម្ពស់សន្តិភាព ស្ថិរភាព កិច្ចសហប្រតិបត្តិការ និងការអភិវឌ្ឍសម្រាប់ជាប្រយោជន៍ដល់ប្រទេសទាំងពីរ។

ជាមួយគ្នានេះអ្នកនាំពាក្យរូបនេះក៏បានឱ្យដឹងនៅក្នុងសេចក្តីប្រកាសព័ត៌មានខាងលើដែរថាកងកម្លាំងរបស់កម្ពុជា សូមបញ្ជាក់ជាថ្មីនូវការប្តេជ្ញាចិត្តយ៉ាងពេញលេញ ចំពោះកិច្ចព្រមព្រៀងនៃបទឈប់បាញ់ រវាងយោធាកម្ពុជា និងយោធាថៃ ដែលសម្រេចបាននៅទីក្រុងពូត្រាចាយ៉ា កាលពីថ្ងៃទី២៨ ខែកក្កដា ឆ្នាំ២០២៥ បានយ៉ាងម៉ឺងម៉ាត់ និងខ្ជាប់ខ្ជួនបំផុត៕