ដោយ៖ កែវ រតនៈ

អង្គការអុកស្វាម ក្រោមការ​សហការជាមួយបណ្ដា​អង្គការក្នុងស្រុក ក្រសួងនានារបស់រាជរដ្ឋាភិបាល និងដៃគូក្នុង​វិស័យឯកជននៅថ្ងៃទី១៩ ខែវិច្ឆិកា នេះ បាន​បិទបញ្ចប់​ដោយមោទនភាព នូវ​គម្រោង​ “សមភាពសម្រាប់ ទាំងអស់គ្នា” (Fair for All) ដែល​បានអនុវត្តអស់រយៈពេលប្រាំឆ្នាំ​កន្លងមក ។ គម្រោងនេះ​ បានចាប់​ផ្ដើមអនុវត្ត​ក្នុងឆ្នាំ ២០២១ ហើយចាប់តាំងពីពេលនោះមក គម្រោងបានជួយ​ជំរុញការផ្លាស់ប្តូរដ៏មានអត្ថន័យនៅក្នុងវិស័យកសិកម្មរបស់កម្ពុជា ដោយបាន​ជះឥទ្ធិពលលើគោលនយោបាយ ​បង្កើនសំឡេង​សហគមន៍ និងលើកកម្ពស់អភិបាលកិច្ចប្រកបដោយបរិយាបន្ន។

បើតាមអង្គការអុកស្វាម គម្រោង​សមភាពសម្រាប់ទាំងអស់គ្នា ប្រើយុទ្ធសាស្ត្រ​ប្រមូលផ្ដុំ​​ភាគី​ពាក់ព័ន្ធ​ចម្រុះ​ ដើម្បី​ដោះស្រាយ​បញ្ហា​ប្រឈម​ជា​ប្រព័ន្ធ​ក្នុង​ខ្សែច្រវាក់​តម្លៃ​ដំណាំ​ចេក និង​កៅស៊ូ។ តាមរយៈ​កិច្ច​សន្ទនា​ថ្នាក់​ជាតិ និង​ការចូលរួម​ពី​មូលដ្ឋាន គម្រោង​នេះ​បានឆ្លុះបញ្ចាំង​ក្ដីកង្វល់​​របស់​កម្មករ​​ក្នុងវិស័យ​កសិកម្ម ដែល​ជំរុញ​​ឱ្យរដ្ឋាភិបាល​ប្តេជ្ញា​ចិត្ត​ក្នុង​ការ​ពង្រឹង​កិច្ចគាំពារ​ការងារ​​ និង​អនុវត្ត​ច្បាប់​របប​សន្តិសុខ​សង្គម។ កិច្ចខិតខំប្រឹងប្រែង​ទាំងនេះ​បាន​​នាំឱ្យមានការ​ចុះធ្វើអធិការកិច្ចជាថ្មី និង​ការត្រួតពិនិត្យឡើងវិញ ពីបេឡាជាតិ​​​សន្តិសុខ​សង្គម (ប.ស.ស.) ដែលនេះ​​ជា​សញ្ញា​នៃ​ការ​ឆ្ពោះទៅរក​គណនេយ្យភាព និង​សុខុមាលភាព​កម្មករប្រសើរ​ជាងមុន ។

ថ្លែងក្នុងពិធីអបអរសាទរសមិទ្ធិផលគម្រោងសមភាពសម្រាប់ទាំងអស់គ្នា ឆ្នាំ ២០២១ - ២០២៥ លោកស្រី ភាណ សោភ័ណ នាយិការ​អង្គការ​អុកស្វាម មានប្រសាសន៍ថា “គម្រោង សមភាពសម្រាប់ទាំងអស់គ្នា បាន​បង្ហាញថា ការ​ផ្លាស់ប្ដូរយូរអង្វែង​កើត​ចេញពីសកម្មភាពជាសមូហភាព និង​ការ​សន្ទនា​យ៉ាងមោះមុត ។ តាម​រយៈការកៀរគរកម្មករ សហគមន៍ និងអ្នកធ្វើការសម្រេចចិត្តឱ្យ​មកជួបជុំគ្នា មានន័យថាយើងបានជួយរៀប​ចំគោលនយោបាយផ្សេងៗ ដែលការពារសិទ្ធិ និងលើកកម្ពស់សមធម៌នៅក្នុងវិស័យកសិកម្មរបស់កម្ពុជា”។

ជាមួយគ្នានេះលោកស្រី សេង រាសី នាយកប្រតិបត្តិអង្គការ ស៊ីលីកា មានប្រសាសន៍ថា “គម្រោងនេះ​ផ្ដល់ភាពអង់អាចដល់សហគមន៍​ឲ្យ​ហ៊ាននិយាយស្ដីឱ្យគេបាន​ដឹង ។ រាប់តាំងពី​កសិករ​នៅមូលដ្ឋាន រហូតដល់វេទិកា​ថ្នាក់ជាតិ គឺយើង​បានឃើញថា ការ​ចូលរួមបែបបរិយាបន្ន​អាចជំរុញ​ឱ្យ​មានការ​កែប្រែគោលនយោបាយ​ពិត​ប្រាកដ​​ និងពង្រឹង​ដល់​អភិបាលកិច្ច​តាមបែបលទ្ធិប្រជាធិបតេយ្យ” ។ លោកស្រីបន្តថា ភាពធន់នឹងអាកាសធាតុ និងសមភាពយេនឌ័រ ក៏ជាផ្នែកស្នូល​នៃការងារតស៊ូមតិរបស់គម្រោង​សមភាពសម្រាប់ទាំងអស់គ្នា ផងដែរ។ តាមរយៈការពិគ្រោះយោបល់ និងឯកសារគោលនយោបាយ គម្រោងនេះបានរួមចំណែកដល់របៀបវារៈជាតិស្តីពីអាកាសធាតុរបស់ប្រទេសកម្ពុជា ដោយលើកកម្ពស់ថាមពលកកើតឡើងវិញ និងយុទ្ធសាស្ត្រសម្របខ្លួនប្រកបដោយបរិយាបន្ន ។ ទន្ទឹមនឹងនេះ គំនិតផ្តួចផ្តើមនានា ដូចជា “ទឹកភ្នែកពណ៌ស” ជាដើម​ បានប្រើប្រាស់សិល្បៈ និងសកម្មនិយម ដើម្បីបង្ហាញពីបទពិសោធន៍របស់ស្ត្រី ដែលបានបំផុស​​ឱ្យមានការសន្ទនាជាសាធារណៈ និងជំរុញយុត្តិធម៌យេនឌ័រ។

គម្រោងសមភាពសម្រាប់ទាំងអស់គ្នា ក៏បានជំរុញលទ្ធភាព​ទទួលបានយុត្តិធម៌ តាមរយៈការ​គាំទ្រនីតិវិធីថ្មីៗ ដែលអនុញ្ញាតឱ្យកម្មករម្នាក់ៗដាក់ពាក្យបណ្តឹង និងស្វែងរកដំណោះស្រាយតាមរយៈយន្តការ​សន្ធានកម្ម និង​មជ្ឈត្តកម្មជាផ្លូវការ។ ការជំរុញនេះធានាថា បណ្ដឹងសារទុក្ខ​នៅកន្លែងធ្វើការត្រូវបានដោះស្រាយដោយយុត្តិធម៌ និងមានតម្លាភាព ដោយជួយពង្រឹងសិទ្ធិរបស់កម្មករកសិកម្មនៅក្នុងខេត្តចំនួនប្រាំមួយ រួមមានខេត្តកំពត កំពង់ចាម ត្បូងឃ្មុំ ក្រចេះ ស្ទឹងត្រែង និងរតនគិរី។

តំណាងកសិករវិស័យកសិ-ឧស្សាហកម្មចេអំបូងលឿង គឺលោក ឡេង ពិសិដ្ឋថ្លែងថា តាមរយៈគម្រោងសមភាពសម្រាប់ទាំងអស់គ្នា គឺកសិករពិតជាបានបង្ហាញពីផលប៉ះពាល់ ការប្រឈមរបស់កម្មករ ហើយលោកសំណូមពរឱ្យក្រសួងពាក់ព័ន្ធ​ជួយសម្រួលដល់និយោជកធ្វើការយ៉ាងជិតស្និតជាមួយកម្មករនៅពេលមានបញ្ហាផ្សេងៗ។

សម្រាប់លោកស្រី សុវណ្ណ វណ្ណារតន៍ រដ្ឋមន្ត្រីស្ដីទីក្រសួងការងារបណ្ដុះបណ្ដាលវិជ្ជាជីវៈមានប្រសាសន៍ថាក្រសួងការងារបានយកចិត្តទុកដាក់លើកម្មករ កម្មការិនីគ្រប់វិស័យ មិនថាតែនៅក្នុងប្រព័ន្ធ ឬក្រៅប្រព័ន្ធនោះទេ។ ហើយលោកស្រីអះអាងថាបើទោះជាគម្រោងគម្រោងសមភាពសម្រាប់ទាំងអស់គ្នាបានបិទបញ្ចប់ទៅក្តី​ ប៉ុន្តែក្រសួងអាចនឹងប្រើប្រាស់ធនធានដែលមានសម្រាប់បម្រើដល់កិច្ចការដែលជាប្រយោជន៍របស់ប្រជាពលរដ្ឋខ្មែរទាំងគ្នា។

FAIR for ALL (F4A) គឺជាគម្រោង កម្រិតសកល ដែលបានផ្តួចផ្តើមឡើងក្នុងខែមករា ឆ្នាំ ២០២១ និងបញ្ចប់ត្រឹមខែធ្នូ ឆ្នាំ ២០២៥ ហើយបាននិងកំពុងដំណើរការនៅ១៣ ប្រទេស៖ ប្រេស៊ីល អាហ្រ្វិកខាងត្បូង ម៉ូសំប៊ិក ហ្គាណា នីហ្សេរីយ៉ា កេនយ៉ា អ៊ូហ្គង់ដា ប៉ាលេស្ទីន ឥណ្ឌា វៀតណាម ឥណ្ឌូនេស៊ី កម្ពុជា និងមីយ៉ាន់ម៉ា។ ចក្ខុវិស័យរបស់គម្រោងគឺ ធ្វើការគាំទ្រមតិសម្រាប់ការអនុវត្តពាណិជ្ជកម្មដោយស្មើភាពគ្នា ដែលធានាបាននូវការបែងចែកធនធានដោយសមធម៌ គាំទ្រសេវាកម្មសាធារណៈ និងប្រព័ន្ធសុវត្ថិភាពសង្គម លើកកម្ពស់ឯករាជ្យភាពសេដ្ឋកិច្ច និងពង្រឹងសេដ្ឋកិច្ចប្រកបដោយបរិយាប័ន្ន និងនិរន្តរភាព។​ គម្រោង F4A មានបំណងចូលរួមបង្កើតខ្សែច្រវ៉ាក់តម្លៃដែលផ្តល់អំណាចដល់គ្រប់ភាគីពាក់ព័ន្ធទាំងអស់ លើកកម្ពស់សមភាពធនធាននិងការចែកចាយអំណាច ផ្តល់អាទិភាពដល់និរន្តរភាពបរិស្ថាន បង្កើតការងារសមរម្យ និងផ្តល់អត្ថប្រយោជន៍ដល់សហគមន៍មូលដ្ឋាន។ ម្រោងនេះផ្តោតលើការលើកកម្ពស់ការចូលរួមពីក្រុមងាយរងគ្រោះ ដូចជាស្ត្រី សហគមន៍ជនបទ កសិករផលិតខ្នាតតូច កម្មករ ក្នុងគោលបំណងកាត់បន្ថយការចំណាយ និងបង្កើនអត្ថប្រយោជន៍ដែលពួកគេត្រូវទទួលបាន៕

 រូបភាព៖ អង្គការ​អុកស្វាម